Belhar Belydenis (Xhosa)The Belhar Confession:   English   l   Xhosa   l   
       Afrikaans   l   French   l   Sotho
       
       
      Isivumo SaseBelhar

      URCSA Home
      About us
      Media
      Confessions
      Links
      Contact us
      Guest Book
      Ministries: 
      Development
      Public Witness
      Youth 
      Women 
      Curatorium 
      Education &
        training Le yinguqulelo yesiAfrikaans yesivumo-lukholo njangoko samkelwa 
      ngo 1986 yiSinodi yeNGSK kumaZantsi eAfrika. Le nkcazo ilandela iwonga 
      lesivumo-lukholo sika1982 esichasana nokukhuselwa kocalu-calulo ngezizathu 
      zokuziphatha nethiyoloji.
        1. Siyakholwa kuThixo oziqu zithathu emnye, uYise noNyana noMoya 
        oyiNgcwele, othi ngeLizwi lakhe nangoMoya wakhe aziqokelelele iCawe 
        eyeyakhe, aze ayikhusele ayilondoloze ukususela ekuqalekeni kwehlabathi 
        kuse esiphelweni.
        2. Siyakholwa kwicawe engcwele enye eyeyezizukulwana ngezizukulwana, 
        ibubudlelane babangcwele ababiziweyo bevela kuluntu xa lulonke.
        Siyakholwa ukuba umsebenzi kaKrestu wokuxolelanisa uyabonakala kule cawe 
        ububudlelane bokholo bbo bathe baxolelaniswa noThixo nabathe 
        baxolelaniswa omnye nomnye.
        Ngenxa yoko siyakholwa ukuba ubunye becawe kaYesu Krestu  busisiphiwo, 
        bukwangumyalelo; bungamandla abandakanyayo ngomsebenzi kaMoya 
        oyiNgcwele, kodwa kananjalo buyinto ekufuneka iphuthunywe ifunwe, into 
        ekufanele ukuba abantu bakaThixo bahlale bekhuthazwa ukuyakha.
        Siyakholwa ukuba obu bunye kufuneka bubonakale ukuze ihlabathi liqonde; 
        kwaye siyakholwa ukuba ucalu-calulo nobutshaba nentiyo phakathi kwabantu 
        bebodwa okanye bengamaqela sisono esesoyiswa nguKrestu. Ke ngoko yonke 
        into echitha ubunye kufuneka ichaswe, kuba ayinandawo ecaweni kaKrestu. 
        Siyakholwa ukuba obu bunye babantu bakaThixo bufanele ukuba bubonakale 
        busebenza ekuhleni iindlela ngeendlela, ngokuthi sithandane, sibe 
        nobudlelane omnye nomnye ngenxa yobunye esibuphuthumayo 
        nesibuphumelelisayo, ekubeni siziva sinemfanelo yokuzinikezela 
        ngokupheleleyo nangovuyo omnye komnye ukuze sakheke sibe noyolo, 
        nasekubeni sidlelana ngokholo olunye, sinalubizo lunye, simxhelo mnye, 
        sibanye ngezimvo, sinoThixo omnye onguBawo wethu sonke, siphefumlelwa 
        nguMoya omnye, sisabelana ngasonka sinye nandebe-nye, sibhaptizwe 
        ngalubhaptizo lunye, sivuma Gama linye, sithobele Nkosi inye, sizimisele 
        ngomcimbi omnye, lilinye nethemba esabelana ngalo, kukunye ukukuqonda 
        kwethu ukuphakama nobubanzi nobunzulu bothando uKrestu asithande ngalo, 
        sisakheka kunye ukuze sifuze uKrestu sibe luluntu olutsha, sithwalisane 
        ubunzima, size ngokwenjenjalo siwufeze umyalelo kaKrestu, sixhomekekane 
        sakhane, siyalane sithuthuzelane, sidlelane ngokuthwala ubunzima ngenxa 
        yobulungisa, sithandaze ngamxhelo mnye, sibambisane ekumsebenzeleni 
        uThixo kweli hlabathi, sikuchase kunye konke okunokuthintela nokuchitha 
        obu bunye.
        Siyakholwa ukuba obu bunye bunokuphunyeleliswa kuphela kukuqhutywa 
        yintliziyo kungekuko ngokunyazelwa; kwaye sikholwa ukuba, ngenxa 
        yoxolelaniso oludalwe nguKrestu, iindidi ngeendidi zeziphiwo zoMoya 
        namathuba neemvelaphi neembono, kwakunye neentetho ezahlukeneyo 
        neenkqubo-ntlalo ezingafaniyo, zisivulela ithuba lokuba sikhonzane 
        sakhane siluhlanga olunye olubonakalayo lukaThixo. 
        Siyakholwa ukuba ukholo lwenene lokukholwa kuYesu Krestu lulo kuphela 
        oluyimfuneko ukuze umntu abe nokuba lilungu lwale cawe.
        Ke ngoko siyayikhaba nayiphi na imfundiso ethi indawo ephambili 
        kukungafani kwabantu ngokwendalo, okanye kukwahlulahlulwa kwabo ngenxa 
        yesono, ze ke le mfundiso ithintele okanye ichithe ubunye obubonakalayo 
        nobusebenzayo becawe, ide ibange ukusekwa kweecawe ezahlukeneyo.
        Kananjalo sikhaba nayiphi na imfundiso ehanahanisayo ngokuthi obu bunye 
        bomoya bugcinwa ngenene ngentambo yoxolo xa amakholwa anesivumo esinye 
        athe ahlukaniswa ngenxa yokungafani nangenxa yokungaxolelaniseki.
        Sikwakhaba nayiphi na imfundiso ekhanyelayo ukuba kusisono ukukulandula 
        ukubuphuthuma obu bunye obubonakalayo obusisiphiwo esinqabileyo.
        Kanjaqo sikhaba nayiphi na imfundiso ethi ngokuvakalayo okanye ithe 
        cwaka ihanahanise ngokuthi ubulungu becawe bukwaxhomekeke kumlibo 
        wokuzalwa okanye nakuyiphi na enye indawo enxulumene nemeko yomntu 
        nenkqubo-ntlalo.
        3. Siyakholwa ukuba uThixo icawe yakhe uyiphathise udaba loxolelaniso 
        olukho kuye nangaye uYesu Krestu; cawe leyo ibiziweyo ukuba ibe yityiwa 
        yehlabathi kwanokhanyiso lwalo; icawe ekuthiwa inoyolo kuba iyimbumba 
        yabaxolisi; icawe elingqina ngamazwi nangezenzo, ingqinela izulu elitsha 
        nehlabathi elitsha elimiwa ngobulungisa.
        Siyakholwa ukuba uThixo uthe ngeLizwi lakhe elidala ubomi nangoMoya 
        wakhe umniki-bomi waloyisa igunya lesono nokufa, wathi ngokwenjenjalo 
        wakoyisa nokungaxolelaniseki nentiyo, ubukrakra bentliziyo nobutshaba; 
        kananajalo ngeLizwi lakhe elidala ubomi nangoMoya wakhe umniki-bomi 
        uThixo abantu bakhe ubanike igunya lokumthobela ngendlela entsha 
        enokuthi nakumzi jikelele nakwihlabathi izekelise ngeendlela ezintsha 
        zenkqubo-ntlalo.
        Siyakholwa ukuba olu daba lwenziwa lungabi nakukholwa, ze ke 
        nempembelelo yalo encedayo ithintelwe, ukuba luvakaliswa kwilizwe 
        elibanga ukuba lilelobuKrestu kanti kulo kuyanyazelwa ukwahlulwa 
        kwabantu ngokobuzwe, ze ke bangathembani koko bathiyane babe nobutshaba.
        Siyakholwa ukuba iyalahlekisa yaye iyimfundiso ezimisele ukulawula 
        iinqondo zabantu nayiphi na imfundiso ethi ukwahlulwa kwabantu 
        ngonyanzelo ngolu hlobo yinto esiyifundiswa ziiNdaba eziMnandi 
        zikaThixo, ibe ikutyeshela ukuthobela umyalelo kaThixo iyihambe indlela 
        yoxolelaniso, ize ithi ngenxa yokwenza ingaqalanga yaqonda nangenxa 
        yokoyika nokungabakhathaleli abanye nakukuswela ukholo isuke iwakhanyele 
        amandla eeNdaba eziMnandi okuxolelanisa.
        Ke ngoko siyayikhaba nayiphi na imfundiso ethi iiNdaba eziMnandi 
        zikaThixo okanye intando kaThixo ziyakuvuma ukuba abantu mabahlulwe 
        ngonyanzelo ngokobuzwe nangebala kwimeko elolu hlobo, ze ke 
        ngokwenjenjalo ithintele iphuthise ukuvakaliswa nokuxhanyulwa 
        koxolelaniso olukho kuKrestu.
        4. Siyakholwa ukuba uThixo wazityhila engulowo uthanda ukudala 
        ubulungisa noxolo lwenene phakathi kwabantu; othi ngendlela eyodwa 
        ehlabathini elizele zizenzo zentswela-bulungisa nobutshaba abe nguThixo 
        wabahlelelekileyo nabangamahlwempu nabaphethwe ngendlela 
        engafanelekanga, yaye necawe yakhe uyibiza ukuba imlandele kule nto; 
        kananjalo abacinezelweyo ubenzela ubulungisa, abalambileyo abanike 
        isonka; amabanjwa uyawakhulula, iimfama azenze zibe nako ukubona; 
        abantliziyo zidakumbileyo uyabazimasa, abangeneleli abakhusele, 
        iinkedama nabahlolokazi abancede, xenikweni axabayo endleleni 
        yabangendawo; yaye kuye ukukhonza uThixo ngendlela ecocekileyo 
        nengenachaphaza kukubonelela iinkedama nabahlolokazi emngciphekweni 
        wabo; ewe, abantu bakhe ufuna ukubafundisa ukwenza okulungileyo 
        baphuthume ubulungisa.
        Ke ngoko siyakholwa ukuba icawe imelwe kukubanceda abantu nakuluphi na 
        uhlobo lwentlupheko abanokuba kulo, nto leyo ekwathetha ukuthi icawe iya 
        kungqina iphikisane nalo naluphi na udidi lwentswela-bulungisa, khon 
        ukuze ukugweba ngokwemfanelo kugaleleke okwamaza nobulungisa njengomfula 
        ongatshiyo.
        Siyakholwa ukuba icawe, emnikazi wayo inguThixo nje, imelwe kukuma nkqi, 
        ichase intswela-bulungisa, ibaxhase abo bangaphathwanga ngobulungisa; 
        yaye icawe, ilandela uKrestu nje, imelwe kukungqina ichasane nazo zonke 
        iziphathamandla noosomalungelo abalungiselela iziqu zabo kuphela 
        kangangokuba basebenzise abanye bebasindanisa.
        Ke ngoko siyayikhaba nayiphi na imfundiso ezimisele ukulawula iingqondo 
        zabantu ethi iindidi ezithile zokuphathwa kwabantu ngeendlela ezingezizo 
        ezobulungisa zivumelekile, yaye sikhaba nayiphi na imfundiso engavumiyo 
        ukuthi ngenxa yeeNdaba eziMnandi zikaThixo iyichase inkqubo enjalo.
        5. Siyakholwa ukuba icawe iyabizwa ukukuvuma nokukwenza konke oku, 
        imthobela uYesu Krestu oyeyona Ntloko yayo, nokuba kuyachaswa 
        ngabasemagunyeni nayimimiselo yabantu, kananjalo nokuba okuvumayo 
        nokwenza oku ezibizela isohlwayo nembandezelo.
        NguYesu oyiNkosi.
        KuThixo emnye, uyise noNyana noMoya oyiNgcwele, makube ludumo 
        nobungangamsha ngonaphakade kanaphakade.

